اسلام آباد (نیشنل ٹائمز) حکومت نے پیٹرولیم مصنوعات کی قیمتوں میں اضافہ کرتے ہوئے نیا نوٹیفکیشن جاری کر دیا ہے۔ پیٹرولیم ڈویژن کے اعلامیے کے مطابق پیٹرول کی قیمت میں فی لیٹر 6 روپے 51 پیسے کا اضافہ کیا گیا ہے، جس کے بعد نئی قیمت 399 روپے 86 پیسے فی لیٹر مقرر ہو گئی ہے۔
اسی طرح ہائی اسپیڈ ڈیزل کی قیمت میں بھی نمایاں اضافہ کیا گیا ہے اور اسے 19 روپے 39 پیسے فی لیٹر بڑھا دیا گیا ہے۔ اضافے کے بعد ڈیزل کی نئی قیمت 399 روپے 58 پیسے فی لیٹر ہو گئی ہے۔
نوٹیفکیشن کے مطابق نئی قیمتوں کا اطلاق آج رات 12 بجے سے ہوگا۔ مزید برآں پیٹرول پر فی لیٹر لیوی میں 3 روپے 88 پیسے کمی کی گئی ہے، جبکہ ڈیزل پر 28 روپے 69 پیسے فی لیٹر لیوی عائد کر دی گئی ہے، جو اس سے قبل صفر تھی۔
ذرائع کے مطابق یکم مئی کی عام تعطیل کے باعث قیمتوں میں ردوبدل کا اعلان ایک دن پہلے ہی کر دیا گیا۔