تہران(نیشنل ٹائمز) ایرانی وزیر خارجہ عباس عراقچی نے 24 گھنٹے میں دوسری بار فیلڈ مارشل عاصم منیر سے ملاقات کی ہے جس میں امریکا ایران مذاکرات پر تفصیلی بات چیت کی گئی۔
ایرانی نیوز ایجنسی کے مطابق ملاقات میں خطے کی موجودہ سیکیورٹی صورتحال، ایران امریکا کشیدگی اور امن و استحکام کے لیے جاری سفارتی کوششوں پر تفصیلی تبادلہ خیال کیا گیا۔
دونوں رہنماؤں نے باہمی دلچسپی کے امور، دفاعی تعاون اور خطے میں بڑھتی ہوئی کشیدگی کو کم کرنے کے امکانات پر بھی گفتگو کی۔
ملاقات کے دوران اس بات پر زور دیا گیا کہ خطے میں پائیدار امن کے لیے مذاکرات اور سفارتکاری ناگزیر ہیں۔ پاکستانی قیادت نے اس عزم کا اعادہ کیا کہ پاکستان خطے میں امن کے قیام کے لیے اپنا مثبت کردار جاری رکھے گا۔
یہ ملاقات ایسے وقت میں ہوئی ہے جب ایران کے وزیر خارجہ کے حالیہ دورے اور پاکستان کی متحرک سفارتکاری کو عالمی سطح پر اہم پیش رفت کے طور پر دیکھا جا رہا ہے۔
یاد رہے کہ ایرانی وزیرخارجہ جمعے کی رات اسلام آباد پہنچے تھے انہوں نے ہفتے کے روز وزیراعظم شہباز شریف اور فیلڈ مارشل عاصم منیر سے ملاقات کی تھی ۔
عباس عراقچی تہران سے 3 ممالک کے دورے کے سلسلے میں پاکستان اور عمان کے بعد روس بھی جائیں گے۔
دوسری جانب ایرانی خبر رساں ادارے کا کہنا ہے کہ عباس عراقچی کے دوبارہ دورہ پاکستان کا ایران کے ایٹمی مسئلے سے کوئی تعلق نہیں، پاکستان، عمان اور روس کے اپنے جاری علاقائی دورے کے دوران وہ اسلام آباد کے پہلے دورے کے محض ایک دن بعد دوبارہ مختصر دورے پر پاکستان پہنچے ہیں۔
رپورٹ کے مطابق عباس عراقچی پاکستان حکام کے ساتھ حالیہ مشاورت جاری رکھنے کیلیے دوبارہ اسلام آباد آئے ہیں، ہمارے نمائندے کی فراہم کردہ معلومات بتاتی ہیں کہ ان مذاکرات کا ایٹمی معاملے سے کوئی تعلق نہیں ہے۔
دو طرفہ تعلقات پر بات چیت کے علاوہ ایرانی وزیر خارجہ کے ایجنڈے کا اہم نکتہ پاکستانی فریق کو جنگ کے خاتمے کیلیے ایران کی شرائط سے آگاہ کرنا ہے۔
