اسلام آباد (نیشنل ٹائمز) حکومت نے پیٹرولیم مصنوعات کی قیمتوں میں نمایاں رد و بدل کرتے ہوئے پیٹرول اور ڈیزل مہنگے جبکہ مٹی کا تیل سستا کر دیا ہے۔
سرکاری اعلان کے مطابق پیٹرول کی قیمت میں 26 روپے 77 پیسے فی لیٹر اضافہ کیا گیا ہے، جس کے بعد نئی قیمت 393 روپے 35 پیسے فی لیٹر ہو گئی ہے۔ اسی طرح ڈیزل کی قیمت میں بھی 26 روپے 77 پیسے فی لیٹر اضافہ کر دیا گیا ہے اور اس کی نئی قیمت 380 روپے 19 پیسے فی لیٹر مقرر کی گئی ہے۔
پیٹرولیم ڈویژن نے اس حوالے سے باقاعدہ نوٹیفکیشن جاری کر دیا ہے، جس کے مطابق نئی قیمتوں کا اطلاق آج رات 12 بجے سے ہوگا۔
دوسری جانب حکومت نے مٹی کے تیل کی قیمت میں 63 روپے 60 پیسے فی لیٹر کمی کی ہے، جس کے بعد اس کی نئی قیمت 365 روپے 21 پیسے فی لیٹر مقرر کی گئی ہے۔
وزیر پیٹرولیم علی پرویز ملک کا کہنا ہے کہ خطے میں بڑھتی ہوئی کشیدگی کے باعث عالمی منڈی میں تیل کی قیمتوں میں دوبارہ اضافہ ہو رہا ہے۔ انہوں نے بتایا کہ بین الاقوامی معاہدوں کے تحت حکومت کو قیمتوں میں اضافے کا بوجھ عوام تک منتقل کرنا پڑ رہا ہے۔
ان کا مزید کہنا تھا کہ حکومت نے حتیٰ المقدور عالمی سطح پر قیمتوں میں اضافے کا بوجھ خود برداشت کیا، تاہم امید ہے کہ جلد علاقائی حالات بہتر ہوں گے اور عوام کو ریلیف فراہم کیا جا سکے گا۔