اسلام آباد (نیشنل ٹائمز) امریکی صدر ڈونلڈ ٹرمپ نے کہا ہے کہ پاکستان میں امریکا اور ایران کے درمیان مذاکرات آئندہ 36 سے 72 گھنٹوں میں شروع ہوسکتے ہیں۔

رپورٹس کے مطابق ایران نے پہلے امریکا پر جنگ بندی کی خلاف ورزی کا الزام عائد کرتے ہوئے مذاکرات کے دوسرے دور میں شرکت سے انکار کردیا تھا، جس سے سفارتی عمل میں تعطل پیدا ہوگیا تھا۔

صدر ڈونلڈ ٹرمپ نے اس سے قبل امریکی وفد کا دورۂ پاکستان مؤخر کرتے ہوئے جنگ بندی میں توسیع کا اعلان کیا تھا، تاہم ایرانی بحریہ کی ناکہ بندی جاری رکھنے کا عندیہ بھی دیا تھا۔

دوسری جانب ذرائع کا کہنا ہے کہ اسلام آباد میں ایران کے ساتھ مذاکرات اگلے تین روز میں کسی بھی وقت شروع ہوسکتے ہیں، جس سے خطے میں کشیدگی کم کرنے کی نئی امید پیدا ہوگئی ہے۔