بیجنگ (شِنہوا) چین کے حکام نے مالیاتی شعبے میں غیر قانونی اور مشتبہ سرگرمیوں میں ملوث عناصر کے خلاف ایک نئی ملک گیر مہم شروع کر دی ہے جس کا مقصد ضابطہ کاری نظام کو مضبوط بنانا اور صارفین کا تحفظ یقینی بنانا ہے۔
ایک اجلاس میں بتایا گیا ہے کہ یہ مہم وزارت عوامی تحفظ اور نیشنل فنانشل ریگولیٹری اتھارٹی کے اشتراک سے شروع کی گئی ہے۔ جس میں غیر قانونی ڈیپازٹ اور قرضہ فراہم کرنے والے درمیانی ایجنٹس، غیر منظور شدہ آن لائن قرضہ خدمات اور غیر قانونی انشورنس ایجنٹس سمیت دیگر عناصر کو نشانہ بنایا جائے گا۔
حکام نے مجرمانہ نیٹ ورکس کی تحقیقات کو مزید گہرا کرنے اور ان کارروائیوں کے پیچھے چھپے اصل کرداروں کا پیچھا کرنے کا عزم ظاہر کیا۔ انہوں نے اس شعبے سے غیر قانونی سرگرمیوں کو جڑ سے اکھاڑ پھینکنے کے لئے قانون کے سخت نفاذ کے ساتھ ساتھ مالیاتی خدمات میں بہتری لانے پر بھی زور دیا۔
حکام کے مطابق جون سے نومبر 2025 تک جاری رہنے والی گزشتہ مہم کے دوران پولیس نے 1500 سے زائد مقدمات کی تحقیقات کیں، 200 سے زیادہ جرائم پیشہ گروہوں کا قلع قمع کیا گیا جبکہ تقریباً 30 ارب یوآن (4.35 ارب امریکی ڈالر) سے زائد کی مالی بے ضابطگیاں سامنے آئیں۔