پیرس (شِنہوا) امریکی وزیر خارجہ مارکو روبیو نے کہا ہے کہ ایران کے خلاف جاری آپریشن ہفتوں میں مکمل ہونے کا امکان ہے۔
فرانس میں جی 7 وزرائے خارجہ اجلاس میں شرکت کے بعد صحافیوں سے گفتگو کرتے ہوئے انہوں نے کہا کہ آپریشن مناسب وقت پر ختم ہو جائے گا، یہ صرف ہفتوں کی بات ہے مہینوں کی نہیں۔ انہوں نے مزید کہا کہ امریکہ بغیر کسی زمینی فوج کے اپنے مقاصد حاصل کر سکتاہے، جن میں ایران کی میزائل اور ڈرونز صلاحیتوں کو تباہ کرنا بھی شامل ہے۔
امریکی نیوز ویب سائٹ ایکسیوس کے ایک رپورٹر نے سماجی رابطے کے پلیٹ فارم ایکس پر لکھا کہ روبیو نے اپنے جی 7 کے ہم منصبوں کو بتایا ہے کہ ایران کے ساتھ تنازع مزید دو سے چار ہفتوں تک جاری رہ سکتا ہے۔
امریکی وزیر خارجہ نے کہا کہ واشنگٹن امریکی ہتھیاروں کو یوکرین سے مشرق وسطیٰ لے جانے کے لئے تیار ہے، تاہم تاحال یہ اقدام ابھی تک نہیں اٹھایا گیا ہے۔
روس- یوکرین تنازع کے حوالے سے انہوں نے کہا کہ اس مسئلے پر فی الحال کوئی ملاقات طے نہیں ہے۔ مزید برآں انہوں نے یوکرین کے صدر وولودیمیر زیلنسکی کے حالیہ دعوے کو مسترد کیا کہ امریکی سلامتی کی ضمانتیں یوکرین کی طرف سے ڈونباس خطے کے کچھ علاقوں سے دستبردار ہونے سے مشروط ہیں۔ روبیو نے اس دعوے کو “جھوٹ” قرار دیا اور کہا کہ زیلنسکی کو بتایا گیا تھا کہ ایسی ضمانتیں صرف تنازع ختم ہونے کے بعد ہی دی جائیں گی۔