ماپوتو (شِنہوا)موزمبیق میں تعینات 26 ویں چینی طبی ٹیم نے موزمبیق کے دارالحکومت ماپوتو کے مضافاتی شہر ماتولا میں اورفنیٹو آکوسیڈا نامی یتیم خانے کے بچوں کو مفت طبی خدمات فراہم کیں اور ضروری سامان عطیہ کیا۔
26ویں چینی طبی ٹیم کے سربراہ چھن جیالی نے بتایا کہ ٹیم نے خوراک اور سکول کا سامان عطیہ کرنے کے ساتھ ساتھ بچوں کا بنیادی طبی معائنہ بھی کیا۔ ٹیم کے ارکان نے بچوں کے ساتھ رسہ پھلانگنے اور روایتی چینی کھیلوں جیسی سرگرمیوں میں بھی حصہ لیا۔
چھن نے کہا کہ ہمیں امید ہے کہ ان سرگرمیوں سے بچوں میں صحت کے بارے میں شعور بیدار ہوگا اور وہ ایک خوشگوار ویک اینڈ گزار سکیں گے۔
انہوں نے مزید کہا کہ 2026ء کو چین-افریقہ عوامی تبادلوں کا سال قرار دیا گیا ہے اور یہ موزمبیق کے لئے چین کے صوبے سیچھوان کی طبی امداد کی 50 ویں سالگرہ بھی ہے۔ اس اہم موقع پر طبی ٹیم کمیونٹیز، سکولوں اور اداروں کے دورے اور مفت کلینک جیسے پروگرام منعقد کر رہی ہے تاکہ چین اور موزمبیق کے درمیان دوستی کو مزید گہرا کیا جا سکے۔
یتیم خانے کے دیرینہ نمائندے ٹومیسانے مکامو نے بتایا کہ اس ادارے میں تقریباً 80 بچے مقیم ہیں جبکہ 20 سے زائد مزید بچے دن کے وقت یہاں آتے ہیں۔
انہوں نے چینی طبی ٹیم کے اس اقدام کی تعریف کرتے ہوئے کہا کہ پیشہ ورانہ طبی خدمات تک رسائی بچوں کی فلاح و بہبود کے لئے انتہائی اہم ہے۔ انہوں نے کہا کہ ہمارے لئے یہ بہت اہمیت رکھتا ہے کہ ماہرین یہاں آکر ہماری صحت کا جائزہ لیں اور مشورے دیں۔
چین 1976ء سے موزمبیق میں طبی ٹیمیں بھیج رہا ہے۔ موجودہ ٹیم 26 واں دستہ ہے جو مختلف شعبوں کے ڈاکٹروں پر مشتمل ہے، جن میں ہڈی جوڑ کے امراض ، امراضِ نسواں ، اینستھیزیالوجی، میڈیکل کاسمیٹولوجی اور روایتی چینی ادویات شامل ہیں۔