اسلام آباد (نیشنل ٹائمز) وزیراعظم شہباز شریف کی زیر صدارت خطے کی تیزی سے بگڑتی ہوئی صورتحال پر اجلاس ہوا، جس میں ایندھن کی بچت اور کفایت شعاری کے اقدامات پر غور کیا گیا اور عوام سے پیٹرول اور ڈیزل کے مؤثر استعمال کی اپیل کی گئی۔
اجلاس میں فیلڈ مارشل عاصم منیر اور نیشنل سکیورٹی ایڈوائزر لیفٹننٹ جنرل محمد عاصم بھی شریک ہوئے۔ بریفنگ میں بتایا گیا کہ ملکی ضروریات کے لیے پیٹرولیم مصنوعات کا مناسب ذخیرہ موجود ہے اور مزید انتظامات کیے جا رہے ہیں تاکہ مشرق وسطیٰ اور خطے کی غیر مستحکم صورتحال کے اثرات سے بچا جا سکے۔
وزیراعظم نے ہدایت کی کہ صوبوں کے ساتھ مل کر ایک جامع لائحہ عمل تیار کیا جائے تاکہ ہنگامی صورتحال سے نمٹا جا سکے، اور بچت و کفایت شعاری کے اقدامات کے نتیجے میں عوام کو ریلیف فراہم کیا جا سکے۔
اعلامیے میں کہا گیا کہ عوام کو مشورہ دیا جاتا ہے کہ غیر ضروری سفر سے اجتناب کریں، کار پولنگ اور اجتماعی نقل و حرکت اپنائیں، اور آمد و رفت محدود رکھ کر پیٹرول اور ڈیزل کی بچت کریں۔
وزیراعظم نے اشرافیہ سے بھی مطالبہ کیا کہ وہ ایثار اور قربانی کے جذبے کے ساتھ مثال قائم کریں اور تمام متعلقہ ادارے حالات کی بہتری تک ہنگامی اقدامات کے لیے تیار رہیں۔
