اسلام آباد (نیشنل ٹائمز) ایران، اسرائیل اور امریکا کے درمیان بڑھتی ہوئی کشیدگی کے باعث پاکستان سے مشرقِ وسطیٰ جانے والی مختلف ایئرلائنز کی 100 پروازیں منسوخ کر دی گئی ہیں، جس سے ہزاروں مسافروں کے سفری منصوبے متاثر ہوئے ہیں۔

ذرائع کے مطابق لاہور ایئرپورٹ پر مجموعی طور پر 22 بین الاقوامی پروازیں منسوخ کی گئیں۔ اسی طرح اسلام آباد انٹرنیشنل ایئرپورٹ پر بھی 18 بین الاقوامی پروازیں منسوخ ہوئیں، جس کے باعث بڑی تعداد میں مسافروں کو مشکلات کا سامنا کرنا پڑا۔

ایئرپورٹ ذرائع کا کہنا ہے کہ ملتان، سیالکوٹ، پشاور اور کوئٹہ ایئرپورٹس سے مشرقِ وسطیٰ جانے والی متعدد پروازیں بھی منسوخ کی گئی ہیں۔ علاوہ ازیں کراچی سے بھی آج مشرقِ وسطیٰ کے مختلف شہروں کے لیے کئی پروازیں منسوخ کر دی گئی ہیں۔

حکام کے مطابق پروازوں کی منسوخی کی وجہ خطے میں جاری کشیدہ صورتحال اور فضائی حدود سے متعلق حفاظتی اقدامات ہیں۔ مسافروں کو ہدایت کی گئی ہے کہ وہ ایئرپورٹ آنے سے قبل اپنی متعلقہ ایئرلائن سے پرواز کی صورتحال ضرور معلوم کر لیں۔