جوبا (شِنہوا) جنوبی سوڈان میں چینی طبی ٹیم کے 13 ویں دستے نے جوبا یونیورسٹی کے کلینک میں مقامی عملے کو ابتدائی طبی امداد کی تربیت فراہم کی۔
کلینک میں کام کرنے والے 43 سالہ لیبارٹری ٹیکنیشن ایمانوئل عبداللہ لوکوسا ان 10 طبی کارکنوں میں شامل تھے جنہوں نے اس پروگرام میں شرکت کی۔ تربیت میں خاص طور پر گرنے اور حادثات کے باعث ہونے والے زخموں اور ہڈیوں کے فریکچر پر توجہ دی گئی۔
لوکوسا نے شِنہوا کو بتایا کہ چینی آرتھوپیڈک ڈاکٹر فانگ یونگ کی جانب سے فراہم کردہ اس تربیت نے ان کے علم کو تازہ کیا اور نئی معلومات فراہم کیں۔
لوکوسا کا کہنا تھا کہ اس تربیت نے یونیورسٹی کلینک کے عملے کو قیمتی معلومات فراہم کی ہیں، جس سے وہ اپنی کمیونٹی میں حادثات کے متاثرین کو بروقت اور موثر ابتدائی طبی امداد دے سکیں گے۔
چینی طبی ٹیم کے سربراہ ژانگ ایرچھنگ نے زور دیا کہ یہ تربیت خصوصاً بنیادی مراکز صحت میں کام کرنے والے طبی عملے کے لئے ہنگامی حالات سے نمٹنے میں نہایت اہم ہے۔