بیجنگ (شِنہوا) چین میں سالانہ بہار میلے کا سفری رش شروع ہونے والا ہے، اس دوران مختلف علاقوں کے درمیان سفر کرنے والوں کی تعداد ریکارڈ 9.5 ارب تک پہنچنے کی توقع ہے۔
تجزیہ کاروں کے مطابق اس غیر معمولی اضافے کی وجہ طویل تعطیلات کے دوران لوگوں کا اپنے خاندان کے لوگوں سے ملنا اور سیاحت کی بڑھتی ہوئی مشترکہ طلب ہے۔
حکام کے مطابق نجی گاڑیوں کے ذریعے سڑکوں پر سفر بدستور سب سے زیادہ رہے گا جو بین العلاقائی سفر کا تقریباً 80 فیصد ہوگا۔
ریلوے اور سول ایوی ایشن کے ذریعے مسافروں کی تعداد بالترتیب 54 کروڑ اور 9 کروڑ 50 لاکھ تک پہنچنے کی پیش گوئی کی گئی ہے جبکہ مجموعی ٹریفک اور یومیہ بلند ترین آمدورفت دونوں کے سابقہ ریکارڈ ٹوٹنے کی توقع ہے۔
اس سال بہار میلہ یا چینی نیا سال 17 فروری کو آ رہا ہے۔ سرکاری تعطیلات 9 دن پر مشتمل ہوں گی جبکہ سفر کا رش 13 مارچ تک جاری رہے گا۔
چونکہ یہ تہوار خاندان کے افراد سے ملنے کے لئے ملک کا ایک اہم ترین موقع ہوتا ہے، اس لئے حکام نے تمام مسافروں کے محفوظ اور ہموار سفر کو یقینی بنانے کے لئے خصوصاً بڑے ٹرانسپورٹ مراکز پر سہولیات اور گنجائش میں اضافہ کیا ہے۔