دمشق(نیشنل ٹائمز) امریکی فوجیوں کی ہلاکت پر جوابی کارروائی کرتے ہوئے امریکا نے شام میں داعش کے ٹھکانوں پر شدید فضائی حملے شروع کر دیے۔
غیر ملکی میڈیا کے مطابق لڑاکا طیاروں، ہیلی کاپٹروں نے وسطی شام میں متعدد اہداف کو کامیابی سے نشانہ بنایا ہے، امریکی وزیرِ دفاع پیٹ ہیگسیتھ نے کہا ہے کہ آپریشن ہاک آئی سٹرائیک کا مقصد داعش کے بنیادی ڈھانچے اور ہتھیاروں کی تنصیبات کو ختم کرنا تھا۔واضح رہے کہ گزشتہ ہفتے شام کے قدیم شہر تدمر (پالمیرا) کے قریب مشترکہ گشت کے دوران امریکی اور شامی افواج پر فائرنگ کے واقعے میں 2 امریکی فوجیوں سمیت 3 امریکی شہری ہلاک ہوئے تھے، جس پر صدر ٹرمپ نے انتہائی سخت جواب دینے کا وعدہ کیا تھا۔شام پر فضائی حملے کے بعد سوشل میڈیا پلیٹ فارم ٹروتھ سوشل پر جاری بیان میں امریکی صدر ڈونلڈ ٹرمپ نے بتایا کہ شام میں داعش کے ٹھکانوں پر شدید حملے کر رہے ہیں، شام کی حکومت امریکی کارروائیوں کی مکمل حمایت کر رہی ہے۔انہوں نے مزید کہا کہ داعش کے خلاف وعدے کے مطابق بھرپور جوابی حملے کیے جا رہے ہیں، امریکا پر حملہ کرنے والوں کو پہلے سے زیادہ سخت جواب ملے گا، دوسری جانب شامی حکومت نے بھی داعش کے خلاف فوجی آپریشنز جاری رکھنے کا اعلان کیا ہے۔