نیویارک(نیشنل ٹائمز)اقوام متحدہ کے مانیٹرنگ ادارے انٹیگریٹڈ فوڈ سکیورٹی فیز کلاسیفیکیشن انیشی ایٹو نے کہا ہے کہ غزہ میں سردیوں کی بارشوں سے آنے والے سیلاب کے باعث بھوک میں اضافہ ہو رہا ہے۔غیر ملکی خبرایجنسی کے مطابق اقوام متحدہ نے اپنے ایک بیان میں کہا ہے کہ غزہ میں اگست میں اعلان کیا گیا قحط اب انسانی امداد کی بہتررسائی کی بدولت ختم ہو گیا ہے، لیکن اقوام متحدہ کی جانب سے صورتحال بدستور نازک رہنے سے متعلق خبردار کیا گیا ہے۔اقوام متحدہ کے مانیٹرنگ ادارے انٹیگریٹڈ فوڈ سکیورٹی فیز کلاسیفیکیشن انیشی ایٹو کا کہنا ہے کہ غزہ پٹی میں فوڈ سکیورٹی کی صورتحال میں بہتری آئی ہے، لیکن صورتحال اب بھی نازک ہے کیونکہ غزہ کی آبادی کا 70 فیصد سے زائد حصہ عارضی پناہ گاہوں میں رہنے پر مجبور ہے جہاں بارشوں کے باعث سیلابی صورتحال کی وجہ سے بھوک میں اضافہ ہو رہا ہے۔اقوام متحدہ کے مانیٹرنگ ادارے نے یہ بھی بتایا کہ غزہ پٹی کو ایمرجنسی درجہ بندی میں شامل کیا گیا لیکن غزہ کے کسی بھی علاقے کو اپریل 2026ء تک قحط کی درجہ بندی میں شامل نہیں کیا گیا ہے۔