اسلام آباد(نیشنل ٹائمز) وزیراعظم شہباز شریف نے حکومتی اور اتحادی جماعتوں کے سینیٹرز کے اعزاز میں عشائیہ میں27 ویں آئینی ترمیم کی منظوری کے عمل میں اتحادی جماعتوں کے تعاون کا شکریہ ادا کیا۔وزیر اعظم شہبازشریف کا شرکا کا خیر مقدم کرتے ہوئے کہنا تھا کہ وہ صدر مملکت آصف زرداری اور تمام اتحادی جماعتوں کے سربراہوں کے مشکور ہیں، تمام اتحادی جماعتوں نے اِس قومی سوچ کا بھرپور ساتھ دیا۔اُنہوں نے کہا کہ وفاق کی مضبوطی، ملک کے وسیع مفاد اور صوبوں کےدرمیان ہم آہنگی بڑھانے کے لیے سب نےکوشش کی، گورننس کو بہتر کرنے کے لیے27 ویں آئینی ترمیم پر ہم سب نے مل کر کوشش کی، اِس حکومت کے دوران حاصل کیے گئے تمام سنگ میل حکومت اور اتحادی جماعتوں کے باہمی تعاون کا نتیجہ ہیں۔وزیراعظم کا کہنا تھا کہ پاکستان کی سفارتی کامیابیاں اور دنیا میں نام تمام اتحادی جماعتوں کے درمیان ہم آہنگی اور باہمی اتحاد کی عکاس ہے، ہم سب کی مشترکہ کوششوں کی بدولت پاکستان کو شاندار مقام حاصل ہوا ہے۔شہباز شریف نے مزید کہنا تھا کہ ملکی معاشی صورتحال میں بتدریج بہتری ہو رہی ہے، اللہ کے فضل و کرم سے سیاسی ومعاشی استحکام کی بدولت ملک کی سمت درست ہوئی، ملک کی ترقی و خوشحالی کے لیے سب کو مل کرکام کرنا ہے۔