استنبول(نیشنل ٹائمز) ترکیہ میں 6.1 شدت کا زلزلہ آیا جس کے باعث متعدد عمارتوں کو نقصان پہنچا۔
ترکیہ کے مغربی حصے میں زلزلے کے جھٹکے محسوس کئے گئے جس کے نتیجے میں فوری طور پر کسی جانی نقصان کی اطلاع نہیں ملی۔رپورٹس کے مطابق زلزلے کی شدت 6.1 ریکارڈ کی گئی جس کا مرکز بالیکسیر صوبے کے قصبے سندرگی میں تھا جبکہ گہرائی تقریبا 6 کلو میٹر ریکارڈ کی گئی۔زلزلے کے جھٹکے استنبول، بورصہ، مانیسا اور ازمیر سمیت کئی شہروں میں محسوس کئے گئے رپورٹس کے مطابق سندرگی میں متعدد عمارتوں کو نقصان پہنچا، زلزلے کے باعث لوگوں میں شدید خوف و ہراس پھیل گیا اور شہری خوفزدہ ہو کر گھروں سے باہر نکل آئے۔یاد رہے کہ اگست میں اسی علاقے میں 6.1 شدت کا زلزلہ آیا تھا جس کے نتیجے میں ایک شخص جاں بحق اور درجنوں زخمی ہوئے تھے جبکہ اس سے قبل ترکیہ میں 2023ء میں آنے والے ہولناک زلزلے میں 55 ہزار سے زائد افراد جاں بحق ہوئے تھے۔