واشنگٹن(نیشنل ٹائمز) امریکی صدر ڈونلڈ ٹرمپ نے کہا ہے کہ میں نہیں چاہتا دنیا میں تیسری جنگ عظیم شروع ہوجائے، عالمی امن کے قیام کے لیے بھرپور کوششیں کر رہے ہیں۔
امریکی صدر ڈونلڈ ٹرمپ نے میڈیا سے گفتگو کرتے ہوئے کہا ہے کہ اسرائیل کو خوش قسمتی سے اپنے یرغمالی واپس مل گئے ہیں، میں 8 جنگیں روک چکا ہوں اور نویں جنگ بھی روکنا چاہتا ہوں، روس یوکرین نویں جنگ ہے جسے میں روکنے کی کوشش کررہا ہوں۔انہوں نے کہا ہے کہ صدر بائیڈن ایک بےوقوف شخص تھا اس نے جنگیں رکوائیں نہیں بلکہ شروع کرائیں، امید ہے روس یوکرین کی جنگ جلد روکنے میں کامیاب ہوجائیں گے تاکہ یورپ کو استحکام مل سکے۔ٹرمپ نے زور دیا کہ وہ دنیا میں تیسری جنگِ عظیم کے آغاز کے سخت خلاف ہیں اور عالمی امن کے قیام کے لیے بھرپور کوششیں کر رہے ہیں۔یاد رہے کہ گذشتہ روز بھی امریکی صدر ڈونلڈ ٹرمپ نے ایف بی آئی ڈائریکٹر کے ہمراہ پریس کانفرنس کرتے ہوئے کہا تھا کہ میں نے اب تک 8 جنگیں رکوائیں جن میں سے 6 جنگیں ٹیرف کے ذریعے روکی گئیں، ٹیرف ہماری سلامتی کے لیے انتہائی اہم ہیں۔انہوں نے ایک بار پھر ذکر کرتے ہوئے کہا تھا کہ پاک بھارت کشیدگی کے دوران 7 طیارے گرائے گئے اور دونوں ممالک ایٹمی جنگ کے قریب پہنچ گئے تھے، واضح بتا دیا تھا جنگ کریں گے تو امریکا تجارت بند کر دے گا۔صدر ٹرمپ نے افسوس کا اظہار کرتے ہوئے کہا کہ آٹھ مہینوں میں آٹھ جنگیں روکیں لیکن اس کے باوجود انہیں نوبیل انعام نہیں ملا۔