غزہ(نیشنل ٹائمز) غزہ سے اسرائیلی یرغمالیوں کی رہائی آج شروع ہوگی۔
عرب میڈیا کے مطابق حماس کی جانب سے 20 زندہ یرغمالیوں کو رہا کیا جائے گا، اسرائیلی مغویوں کو رہائی ملتے ہی فلسطینی قیدیوں کو رہا کردیا جائے گا، اس حوالے سے ترجمان اسرائیلی حکومت نے بتایا کہ وہ ان 28 دیگر یرغمالیوں کی لاشیں وصول کرنے کی تیاری کر رہے ہیں جن کی موت کی تصدیق ہوچکی ہے۔اسرائیلی ترجمان نے مزید بتایا کہ فلسطینی قیدیوں کی رہائی کا عمل اس وقت شروع کیا جائے گا جب غزہ سے یرغمالیوں کو اسرائیل کے حوالے کر دیا جائے گا۔دوسری جانب حماس کے سیاسی بیورو کے سینئر رکن غازی حماد کا عالمی میڈیا سے گفتگو میں کہنا تھا کہ اسرائیل فلسطینی قیدیوں کی فہرستوں سے تبدیلیاں کر رہا ہے، انہوں نے خبردار کیا کہ اگر عالمی دباؤ برقرار نہ رہا تو اسرائیلی وزیراعظم نیتن یاہو دوبارہ جارحیت پر اتر آئیں گے۔غازی حماد نے عرب ممالک اور ثالثوں سے ایک بار پھر اپیل کی کہ وہ معاہدے پر مکمل عمل درآمد یقینی بنائیں، ان کا کہنا تھا کہ حماس مصر، قطر اور ترکیہ کے ساتھ رابطے میں ہے اور معاہدے کے مطابق یرغمالیوں کی رہائی کے حوالے سے تیاری کررہا ہے۔ان کا مزید کہنا تھا کہ اسرائیل کی جانب سے دستاویزات میں فلسطینی قیدیوں کے ناموں کی تصدیق کے عمل نے رکاوٹیں پیدا کر دی ہیں۔