گوانگ ژو (شِنہوا) 138 ویں چین درآمدی و برآمدی میلہ جسے کینٹن میلہ بھی کہا جاتا ہے، کے لئے 72 کھیپوں پر مشتمل درآمدی اشیاء 16 ستمبر سے 11 اکتوبر کے درمیان چین پہنچ چکی ہیں جن کی مجموعی مالیت تقریباً 39 لاکھ 60 ہزار یوآن (تقریباً 5 لاکھ 57 ہزار 370 امریکی ڈالر) ہے۔
گوانگ ژو کسٹمز کے حکام کا کہنا ہے کہ جیسے جیسے میلے کی تاریخ قریب آ رہی ہے مزید نمائشی اشیاء کی آمد متوقع ہے۔
138 واں کینٹن میلہ 15 اکتوبر سے چین کے جنوبی صوبے گوانگ ڈونگ کے دارالحکومت گوانگ ژو میں شروع ہو گا جس میں 30 ہزار مربع میٹر پر محیط درآمدی نمائش کا علاقہ مختص کیا گیا ہے۔
نمائشی اشیاء 13 ممالک اور خطوں کے 222 نمائش کنندگان کی جانب سے آ رہی ہیں جن میں مصر، ترکی، تھائی لینڈ اور جاپان شامل ہیں اور ان میں کچن اپلائنسز، ہارڈ ویئر ٹولز اور مشینری آلات جیسی اشیاء شامل ہیں۔
نمائش کے عمل کو آسان بنانے کے لئے گوانگ ژو کسٹمز نے خصوصی سہولتی اقدامات متعارف کروائے ہیں جن میں ضمانت کی شرط سے استثنیٰ، موقع پر نگرانی اور ترجیحی کلیئرنس کے لئے گرین چینلز شامل ہیں تاکہ داخلے سے لے کر نمائش کے بعد کے مراحل تک موثر کسٹمز سروس یقینی بنائی جا سکے۔