ریاض / اسلام آباد (نیشنل ٹائمز) سعودی عرب نے پاکستان اور افغانستان کی سرحد پر حالیہ دنوں میں بڑھتی ہوئی کشیدگی اور جھڑپوں پر گہری تشویش کا اظہار کیا ہے، اور دونوں ہمسایہ ممالک پر زور دیا ہے کہ وہ تحمل کا مظاہرہ کریں اور کشیدگی کو بڑھانے سے گریز کریں۔
سعودی وزارت خارجہ کی جانب سے جاری کردہ بیان میں کہا گیا ہے کہ “سعودی عرب، پاکستان اور افغانستان کے درمیان سرحدی کشیدگی پر گہری نظر رکھے ہوئے ہے اور خطے کے امن و استحکام کے لیے کسی بھی قسم کے تصادم کو انتہائی تشویشناک سمجھتا ہے۔”
بیان میں مزید کہا گیا کہ “دونوں برادر اسلامی ممالک کو چاہیے کہ وہ اختلافات کے حل کے لیے بات چیت اور سفارتی ذرائع کو اپنائیں، اور خطے میں امن و استحکام کو مقدم رکھیں۔”
سعودی عرب نے امید ظاہر کی ہے کہ پاکستان اور افغانستان کے درمیان باہمی تعاون اور مفاہمت کے ذریعے تمام مسائل کا پرامن حل ممکن ہے، تاکہ نہ صرف دونوں ممالک بلکہ پورے خطے میں امن، ترقی اور خوشحالی کو یقینی بنایا جا سکے۔
