اسلام آباد (نیشنل ٹائمز) 12 ربیع الاول، یوم ولادت مصطفیٰ ﷺ کے موقع پر ملک کے اعلیٰ رہنماؤں نے پوری قوم اور امت مسلمہ کو مبارکباد پیش کی اور نبی کریم ﷺ کی تعلیمات پر عمل پیرا ہونے کی ضرورت پر زور دیا۔

وزیر اعظم محمد شہباز شریف کا پیغام

وزیر اعظم محمد شہباز شریف نے کہا ہے کہ سیرت طیبہ ﷺ ہر دور میں رہنمائی کا سرچشمہ ہے اور قوم کو اپنے دستور، قانون اور اجتماعی زندگی میں نبی کریم ﷺ کی تعلیمات کو شامل کرنے کا عزم کرنا ہوگا۔ انہوں نے کہا کہ 12 ربیع الاول کی مبارک ساعت میں ہمیں اپنی نئی نسل کو نبی ﷺ کی سیرت سے روشناس کرانا ہوگا تاکہ وہ خیر، محبت، بھائی چارہ اور امن کی تعلیمات کو عام کر سکیں۔

وزیراعظم نے کہا کہ پاکستان کو سیرت النبی ﷺ کے سنہری اصولوں پر استوار کرنا ہوگا، تعصب، نفرت اور انتہا پسندی کو رد کرنا ہوگا اور اتحاد، بھائی چارے اور ایثار کو فروغ دینا ہوگا۔ انہوں نے دعا کی کہ اللہ تعالیٰ پاکستان کو سلامت رکھے اور ہمیں نبی کریم ﷺ کی محبت و اطاعت میں زندگی گزارنے کی توفیق دے۔

صدر مملکت آصف علی زرداری کا پیغام

صدر آصف علی زرداری نے کہا کہ یہ تاریخی موقع امت مسلمہ کے لیے خوشی اور عقیدت کا باعث ہے اور ہمیں اپنی زندگیوں کو تعلیمات نبوی ﷺ کے مطابق ڈھالنے کا عہد کرنا چاہیے۔ انہوں نے کہا کہ نبی کریم ﷺ کے اصول عدل، رحمت، اخوت اور امن پر مبنی ہیں جو آج کے چیلنجز کا حل ہیں۔

صدر نے کہا کہ ہمیں اختلافات کو پس پشت ڈال کر ملک و قوم کی ترقی کے لیے متحد ہونا ہوگا اور کمزوروں، یتیموں اور ضرورت مندوں کی مدد کرنی ہوگی۔ انہوں نے سیلاب متاثرین کی صورت حال پر تشویش کا اظہار کیا اور کہا کہ حکومت اور امدادی ادارے متاثرین کی بحالی کے لیے سرگرم عمل ہیں۔ صدر نے دعا کی کہ اللہ تعالیٰ ہمیں نبی کریم ﷺ کی سیرت پر عمل کرنے کی توفیق دے اور ہمارا معاشرہ مساوات اور امن کا گہوارہ بنے۔

چیئرمین پیپلز پارٹی بلاول بھٹو زرداری کا پیغام

چیئرمین پاکستان پیپلز پارٹی بلاول بھٹو زرداری نے کہا کہ حضرت محمد مصطفیٰ ﷺ تمام جہانوں کے لیے رحمت اور تا قیامت انسانیت کے لیے ہدایت کا سرچشمہ ہیں۔ آپ کی زندگی خدمتِ انسانیت اور فلاح و بہبود کی مثال ہے۔ بلاول نے کہا کہ نبی کریم ﷺ نے ہمیشہ انسانوں کی مدد، اخوت اور ایثار کا درس دیا اور ان کا فرمان کہ “بہترین انسان وہ ہے جو دوسروں کو فائدہ پہنچائے” ہمارے لیے روشنی کا مینار ہے۔

انہوں نے کہا کہ نبی ﷺ نے عدل و انصاف پر مبنی ایسا معاشرہ قائم کیا جو قیامت تک انسانیت کے لیے مثال ہے۔ آج ہمیں آپ ﷺ کی تعلیمات کو عام کرنا ہوگا تاکہ حقیقی اخوت و یگانگت قائم ہو۔ بلاول نے دعا کی کہ اللہ تعالیٰ ہمیں نبی کریم ﷺ کی تعلیمات پر عمل کرنے کی توفیق دے۔