انٹرنیشنل ڈیسک(نیشنل ٹائمز) بھارتی انتہاپسند جماعت راشٹریہ سویم سیوک سنگھ کے سابق ترجمان نےکہا ہے کہ بھارتی جنتا پارٹی (بی جے پی) کے رہنما دہشت گردی کی وارداتوں میں ملوث ہیں۔
انتہا پسند جماعت کے سابق ترجمان یشونت شندے نےکہا کہ آر ایس ایس اور بی جے پی بھارت میں دہشت گردی کر کے مسلمانوں پر الزام لگاتی ہے۔یشونت شندے نے 2006 میں مہاراشٹر بم دھماکے کی نشاندہی کی جس میں وشوا ہندو پریشد کے ایک رکن سمیت 2 افراد ہلاک ہو گئے تھے، اس مقدمے میں مسلمانوں کو ملوث کیا گیا تھا مگر عدالت نے عدم ثبوت کی بنا پر تمام ملزمان کو بری کر دیا تھا۔یشونت شندے نے کہا کہ آر ایس ایس نے مہاراشٹر کے شہر اورنگ آباد میں ایک مسجد تلاش کی اور اس میں بم بنانے شروع کر دیے، بم بنانے میں آر ایس ایس کے ارکان ‘راکیش ڈھویڈے’ اور ‘روی دیو ‘ ملوث تھے۔انہوں نے دعویٰ کیا کہ آر ایس ایس کے ایک رہنما اندریش کمار نے انہیں بھی دہشت گردی میں ملوث ہونے کو کہا تھا۔اس حوالے سے سابق ترجمان نے سپریم کورٹ میں بھی پٹیشن دائر کی تاہم عدالت کی جانب سے کوئی کارروائی سامنے نہیں آئی، سابق ترجمان شندے نےعدالت پر اندرونی دباؤ کا الزام لگاتے ہوئے کہا کہ بھارت کی عدالتیں خاموش تماشائی بنی ہوئی ہیں۔یشونت شندے نے کہا کہ مودی حکومت اور آر ایس ایس ہندوتوا نظریے کے تحت ریاستی دہشت گردی کے سرپرست بن چکے ہیں۔