اسلام آباد(نیشنل ٹائمز) ایشیائی ترقیاتی بینک نے اپنی رپورٹ میں کہا ہے کہ پاکستان میں گزشتہ مالی سال کے دوران مہنگائی میں بڑی کمی آئی۔
ایشیائی ترقیاتی بینک نےجولائی کے لیے ایشین ڈیویلپمنٹ آؤٹ لک رپورٹ جاری کر دی جس میں کہا گیا ہے کہ امریکا کی طرف سے ٹیرف میں اضافے کے باعث برآمدات میں کمی کا امکان ہے۔رپورٹ میں کہا گیا ہے کہ عالمی تجارت میں غیریقینی اورکمزور مقامی طلب سے بھی خطےکے ممالک کی شرح نمو متاثر ہو گی اور رواں سال خطے کی شرح نمو 4.7 فیصد رہنے کا امکان ہے۔ اے ڈی بی رپورٹ کے مطابق مختلف تنازعات سے عالمی تجارت مزید متاثر اور توانائی کی لاگت بڑھنے کا خدشہ ہے، چین کی پراپرٹی مارکیٹ میں اندازے سے زیادہ گراوٹ سے عالمی تجارت متاثر ہو گی۔رپورٹ کے مطابق خطےکے ممالک میں زرعی پیداوار میں اضافے سے مہنگائی 2 فیصد تک رہنے کا امکان ہے، امریکاکی طرف سےترسیلات زر پرٹیکس عائدکرنے سے ایشیائی ممالک کی مشکلات میں اضافہ ہوگا جس سے بھارت، فلپائن اور پاکستان زیادہ متاثر ہونے والے ممالک ہوں گے۔اے ڈی بی رپورٹ کے مطابق پاکستان میں گزشتہ مالی سال میں مہنگائی میں بڑی کمی ہوئی، رواں مالی سال بھی پاکستان میں قیمتوں میں استحکام رہنے کا اندازہ ہے۔رپورٹ کے مطابق پاکستان کے صنعتی اور خدمات کے شعبوں میں ترقی کا امکان ہے، پاکستان کی شرح نمو گزشتہ مالی سال 2.7 فیصد رہی جب کہ رواں مالی سال پاکستان کی شرح نمو کے ہدف 4.2 فیصد میں کمی نہیں کی گئی۔