مری( نیشل ٹائمز)وزیر اعظم شہباز شریف، ن لیگ کے قائد میاں محمد نواز شریف اور وزیر اعلیٰ پنجاب مریم نواز کی اہم قومی امور پر مشاورت ہوئی ہے جس میں وفاقی و پنجاب کابینہ میں رد و بدل اور توسیع پر غور کیا گیا۔
اتوارکو مری میں وزیراعظم شہباز شریف،ن لیگ کے قائد نواز شریف اور وزیر اعلیٰ مریم نواز کی اہم قومی امور پر مشاورت ہوئی۔ذرائع کے مطابق شریف فیملی کے دیگر افراد بھی مشاورتی عمل میں شامل تھے۔ذرائع کا کہنا ہے کہ نواز شریف نے عوامی بہبود کےمنصوبوں کو ترجیح دینےکی ہدایت کی اور وزراء اور وزارتوں کےاحتساب کی پالیسی کوبھی سراہا۔مشاورتی اجلاس میں وفاقی وپنجاب کابینہ میں ردوبدل اور توسیع پر بھی غورکیا گیا جبکہ مون سون کی بارشوں کی وجہ سے عوام کے جان ومال کے نقصان پر اظہار افسوس کیا گیا۔نوازشریف نے متاثرہ خاندانوں کیلئے ریلیف پیکج کی ہدایات بھی جاری کیں۔اس کے علاوہ نوازشریف نے مہنگائی کنٹرول کرنے کیلئے سخت اقدامات اور پرائس میکنزم بنانے کی ہدایت کی۔واضح رہے کہ حالیہ مون سون بارشوں کے باعث گزشتہ 24 گھنٹوں میں مزید 13 افراد جاں بحق ہوگئے جس کے بعد 26 جون سے 20 جولائی تک ہلاکتوں کی مجموعی تعداد 216 ہوگئی۔اس کے علاوہ پنجاب میں موسلادھار بارشوں سے کپاس، گنا اور چاول کی فصلوں کو شدید نقصان پہنچا ہے جس کے باعث کسان پریشان ہیں۔