ریاض(نیشنل ٹائمز)سعودی حکومت کے زائرین حج وعمرہ کو سہولتوں کی فراہمی کیلیے اقدامات کی وجہ سے عازمین کا غار حرا کی چوٹی تک پہنچنا آسان ہوگیا ہے۔ سعودی حکومت کی جانب سے غار حرا کی چوٹی تک جانے والے خصوصی راستے پر کافی کشادہ اور بہترین سیڑھیاں بنائی ہیں اور زائرین کی سہولت کے لیے بورڈز بھی آویزاں کیے گئے ہیں۔غار حرا کے پہاڑ کے دامن میں حرا ثقافتی ولیج بھی بنایا گیا ہے جب کہ ایک بہت بڑی مارکیٹ بھی قائم کی گئی ہیں جہاں سے زائرین کھانے پینے سمیت دیگر اشیائے کی خریداری کر سکتے ہیں،سعودی وزارت حج وعمرہ کی جانب سے حرا پہاڑ کے دامن میں زائرین کو دھوپ سے بچانے کے لیے چھتریاں لگائی گئی ہیں جب کہ سخت گرمی میں ٹھنڈے پانی کے چھڑکائو کے لیے خصوصی فوارے بھی نصب کیے گئے ہیں۔آئندہ برس گالف کارٹ کی سروس بھی شروع کی جا رہی ہے جس کے ذریعے زائرین غار حرا تک مزید آسانی سے پہنچ جائیں گے۔