کراچی ( نیشنل ٹائمز) پاکستان کی ڈرامہ انڈسٹری کے معروف اداکار مظہر علی طویل علالت کے بعد انتقال کرگئے۔ تفصیلات کے مطابق اداکار مظہر علی ان دنوں کراچی کے ایک نجی ہسپتال میں زیرِ علاج تھے جہاں وہ آج خالق حقیقی سے جا ملے، مظہرعلی کے انتقال کی تصدیق ان کے اہلِ خانہ کی جانب سے کی گئی، مرحوم اداکار کی نمازِ جنازہ آج کراچی میں بعد نمازِ مغرب طیبہ مسجد ناظم آباد نمبر 3 میں ادا کی جائے گی۔
بتایا گیا ہے کہ اداکار مظہرعلی فیملی سمیت کینیڈا میں مقیم تھے، تاہم وہ طویل عرصے سے دل اور پھیپھڑوں کے امراض میں مبتلا تھے، مظہرعلی بیماری کی وجہ سے کافی عرصہ امریکہ کے ایک ہسپتال میں بھی انتہائی تشویشناک حالت میں زیر علاج رہے جہاں ان کے دل کی سرجری کی گئی تاہم بدقسمتی سے اس کے بعد ان کا دل مزید متاثر ہوگیا اور وہ کئی روز وینٹی لیٹر پر رہے۔

بتاتے چلیں کہ پاکستان کے سینیئر ورسٹائل اداکار مظہرعلی نے 1980/90ء کی دہائی میں طویل عرصے تک ٹی وی ناظرین کو اپنی شاندار اداکاری کے سحر میں جکڑے رکھا، ان کے مشہور ڈراموں میں ’عروسہ‘ اور ’افشاں‘ نمایاں ہیں، اس کے علاوہ ’شاہین‘ ، ’کالی دیمک‘ اور ’کانچ کی گڑیا‘ سے بھی انہیں کافی شہرت حاصل ہوئی، مظہرعلی نے ’گرہ‘ اور ’ہالہ‘ سمیت دیگر ڈراموں میں بھی اپنی اداکاری کے جوہر دکھائے، مذکورہ ڈراموں میں ان کے کرداروں نے جان ڈال دی اور مظہرعلی کے کام کو ناظرین میں خوب پذیرائی ملی۔