اسلام آباد(نیشنل ٹائمز) چیئرمین پاکستان پیپلزپارٹی و وزیرِ خارجہ بلاول بھٹو زرداری نے سینئر صحافی عادل راشدی کے انتقال پر گہرے دکھ و افسوس کا اظہارکیا۔انہوں نے سوگوار خاندان سے تعزیت کا اظہار کرتے ہوئے کہا کہ مرحوم عادل راشدی کا شمار کہنہ مشق اور غیرجانبدار رائے رکھنے والے صحافیوں میں ہوتا تھا۔مرحوم کی شعبہ صحافت کے لیے خدمات قابلِ ستائش ہیں، جنہیں ہمیشہ یاد رکھا جائے گا۔چیئرمین بلاول بھٹو زرداری نے مرحوم کی مغفرت اور لواحقین کے لیے صبر جمیل کی دعا کی ۔

 

واضح رہے کہ جیو اور جنگ کے سابق ڈائریکٹر اور جنگ انٹرنیٹ کے سابق ایڈیٹر عادل راشدی انتقال کر گئے۔عادل راشدی کے انتقال کی ان کے اہلِ خانہ نے تصدیق کی ہے۔اہلِ خانہ کے مطابق مرحوم عادل راشدی کی نمازِ جنازہ بعد نمازِ عصر زمزمہ مسجد ڈیفنس میں ادا کی جائے گی۔مرحوم تحریکِ پاکستان کے رہنما پیر علی محمد راشدی کے چھوٹے فرزند تھے۔