اسلام آباد (نیشنل ٹائمز)اسلام آباد ہائی کورٹ نے اینکر عمران ریاض کے وکیل کو لاہور ہائی کورٹ سے رجوع کرنے کا حکم دیتے ہوئے ان کی گرفتاری سے متعلق درخواست نمٹا دی۔اینکر عمران ریاض خان کی گرفتاری کے خلاف درخواست پر سماعت چیف جسٹس اسلام آباد ہائی کورٹ جسٹس اطہر من اللہ نے کی۔دوران سماعت چیف جسٹس اطہر من اللہ نے ریمارکس دیے کہ رات کو رپورٹ آئی کہ عمران ریاض کو گرفتار کیا گیا۔وکیل عمران ریاض نے کہا کہ عمران ریاض نے مجھے فون کرکے بتایا کہ وہ اسلام آباد ٹول پلازہ پر ہیں، لاہور ہائی کورٹ میں پولیس نے 17 مقدمات درج ہونے کی رپورٹ دی، لاہور ہائی کورٹ میں الگ سے توہین عدالت کی درخواست دائر کی ہے۔چیف جسٹس اسلام آباد ہائی کورٹ نے ریمارکس دیے کہ ہر عدالت کا اپنا دائرہ اختیار ہے، لاہور ہائی کورٹ اس معاملے کو دیکھ سکتی ہے، اٹک میں عمران ریاض خان کی گرفتاری ہوئی لہذا یہ معاملہ اس عدالت کا دائرہ اختیار نہیں بنتا۔وکیل عمران ریاض نے مؤقف اختیار کیا کہ اس عدالت نے واضح احکامات دیے تھے جن کی خلاف ورزی ہوئی، جس پر عدالت نے کہا کہ عمران ریاض خان کی گرفتاری اسلام آباد پولیس نے نہیں پنجاب پولیس نے کی، ہم اس کیس میں کوئی آبزرویشن نہیں دے رہے۔چیف جسٹس اطہر من اللہ نے کہا کہ اگر لاہور ہائی کورٹ کہے کہ اسلام آباد سے گرفتاری ہوئی تو وہ آرڈر اس عدالت کے سامنے لے آئیے گا، یہ آپ کے مفاد میں ہے کہ لاہور ہائی کورٹ سے رجوع کریں۔عدالت نے عمران ریاض کے وکیل کو لاہور ہائی کورٹ سے رجوع کرنے کا حکم دیتے ہوئے درخواست نمٹا دی۔عمران ریاض کے وکیل نے کہا کہ گزشتہ رات کو عدالت کھولنے پر ہم آپ کے شکر گزار ہیں، جس پر جسٹس اطہر من اللہ نے کہا کہ کوئی بھی درخواست گزار کسی بھی وقت آئے ہم سننے کے لیے تیار ہیں۔