اسلام آباد (نیشنل ٹائمز)پاکستان تحریک انصاف کے رہنما علی محمد خان گزشتہ روز ایوان میں وہ واحد حکومتی رکن تھے جو وزیراعظم عمران خان کے خلاف تحریک عدم اعتماد پر ووٹنگ کے دوران اپنی نشست پر موجود تھے۔عمران خان کے خلاف ووٹنگ کے دوران ایوان میں حکومتی بینچز مکمل طور پر خالی ہو گئے تھے تاہم علی محمد خان ایوان میں موجود رہے اور انہیں اسپیکر ایاز صادق نے خطاب کا موقع بھی دیا ۔سوشل میڈیا صارفین کی جانب سے پی ٹی آئی رہنما کو خاصا سراہا گیا تاہم اب صوبائی وزیر اور پی پی رہنما سعید غنی کی جانب سے بھی علی محمد خان کی تعریف کی گئی ہے۔سعید غنی نے اپنے ٹوئٹر پیغام میں لکھا کہ پی ٹی آئی کے علی محمد خان کی تعریف تو ضرور کرنی چاہیے ،کم از کم وہ اسمبلی میں بیٹھے رہے اور تحریک عدم اعتماد کی کامیابی کے گواہ ہیں۔سعید غنی نے اپنی ٹوئٹ میں ’GameOverIK ‘ کا ہیش ٹیگ بھی استعمال کیا۔