لاہور(نیشنل ٹائمز)سپیکر پنجاب اسمبلی چودھری پرویزالٰہی سے عالمی تبلیغی مرکز کے مرکزی رہنماؤں کے وفد نے اسمبلی چیمبرمیں ملاقات کی۔ وفد میں مولانا عبید اللہ، مولانا عامر، میاں احسن، اویس، ایوب صادق، نعیم بٹ، امتیاز غنی، انوار غنی، آفتاب غنی اور جاوید بھٹی شامل جبکہ ملاقات میں راسخ الٰہی اور صوبائی وزیر معدنیات حافظ عمار یاسر بھی موجود تھے۔ ختم نبوت سے متعلق اٹھائے گئے اقدامات پر وفد نے چودھری پرویزالٰہی کو خراج تحسین پیش کیا۔ سپیکر پنجاب اسمبلی چودھری پرویزالٰہی نے گفتگو کرتے ہوئے کہا کہ میں نکاح نامہ میں ختم نبوت پر ایمان کا حلف شامل ہونےپر قوم کو مبارکباد دیتا ہوں، نکاح نامہ میں ختم نبوت کے حوالے سے حلف نامہ شامل کرنے کیلئے پنجاب اسمبلی نے قرارداد منظور کی جسے بعد ازاں پنجاب کابینہ نے بھی منظور کیا، یہ اللہ تعالیٰ کا فضل ہے ہم اس پر اللہ تعالیٰ کا شکر ادا کرتے ہیں۔ انہوں نے کہا کہ امت میں اتحاد قائم کرنے کیلئے علماء کرام نے ہمیشہ مثبت کردار ادا کیا، ملکی تعمیر و ترقی میں علماء کرام اور حکومت کو مل کر کام کرنا ہوگا۔ علماء کے وفد نے کہا کہ کورونا کا مسئلہ ہو یا انٹرنیشنل رکاوٹیں جب بھی تبلیغی جماعت پر مشکل وقت آیا آپ مدد کرنے میں ہمیشہ صف اول میں رہے، تبلیغی جماعت کے حوالہ سے آپ کی سربراہی میں پنجاب اسمبلی نے انٹرنیشنل لیول پر ہمارا ساتھ دیا، تبلیغی جماعت نے آپ کی کاوشوں کے اعتراف میں وفد کو شکریہ ادا کرنے کیلئے بھیجا ہے۔ علماء کے وفد نے چودھری شجاعت حسین کی جلد صحت یابی کیلئے دعا بھی کی۔