نئی دہلی(شِنہوا)بھارت کی مغربی ریاست گجرات کے ایک چار منزلہ فلاحی ہسپتال کے اندر خوفناک آتشزدگی کے باعث نوول کرونا وائرس کے کم از کم 18 مریض ہلاک ہو گئے ہیں۔حکام کے مطابق آگ ہفتے کے دن کے اوائل میں گجرات کے دارالحکومت گاندھی نگر سے تقریبا 212 کلومیٹر جنوب میں واقع ضلع بھروچ کے ایک ہسپتال کے اندر لگی۔مقامی میڈیا نے ایک پولیس اہلکارکے حوالے سے بتایا کہ آگ اور اس کے نتیجے میں پیدا ہونیوالے دھویں کے باعث نوول کرونا وائرس وارڈ میں موجود 12 مریض ہلاک ہو گئے ہیں۔ ابھی تک یہ واضح نہیں ہو سکا کہ بقایا 6 افراد کی موت ہسپتال میں ہی ہوئی ہے یا دیگر ہسپتالوں میں منتقل کرتے ہوئے۔حکام کے مطابق ہسپتال میں تقریبا 50 دیگر مریض موجود تھے جنہیں بحفاظت دوسرے ہسپتال منتقل کیا گیا ہے۔فوری طور پر آگ لگنے کی وجہ معلوم نہیں ہو سکی ہے۔حکام نے بتایا کہ آگ بھڑک اٹھنے کے بعد فائر فائٹرز اور آگ بجھانے والی گاڑیوں کو فوری طور پر جائے وقوعہ کی جانب روانہ کر دیا گیا تھا۔حکام نے واقعے کی تحقیقات کا حکم دیدیا ہے۔