غزہ (نیشنل ٹائمز) سیکڑوں فلسطینیوں نے غزہ کی پٹی میں احتجاجی مظاہرے کرتے ہوئے اسرائیلی فوج کے مقابلے میں مقبوضہ علاقوں کے عوام اور استقامت کی حمایت کا اعلان کیا۔ اسرائیلی فوج نے مظاہرین پر آنسو گیس کے شیل داغے اور صوتی بم( Stun grenade) کا استعمال کیا جس کے نتیجے میں متعدد فلسطینی زخمی ہوئے۔ فلسطینیوں نے مظاہرے میں استقامتی محاذ سے مطالبہ کیا کہ اسرائیلیوں سے انتقام لینے کیلئے مقبوضہ علاقوں کی جانب راکٹ حملوں کو جاری رکھیں۔ قدس کی غاصب اور جابر صیہونی حکومت کے فوجیوں نے ماہ مبارک رمضان کے آغاز سے ہی فلسطینیوں کیلئے مسجد الاقصی کے دروازوں کو بند کر دیا اور انھیں مسجد الاقصی میں ماہ مبارک رمضان میں عبادت کرنے سے روک دیا جس پر فلسطینیوں اور اسرائیلی فوجیوں میں تصادم ہوا جس میں کئی فلسطینی زخمی ہوئے۔