اسلام آباد(نیوز ڈیسک )وزیراعلیٰ پنجاب عثمان بزدار کی معاون خصوصی ڈاکٹر فردوس عاشق اعوان نے کہا ہے کہ مفاد پرست پی ڈی ایم سینیٹ کی یقینی ہاری ہوئی بازی میں مزید رسوا ہونے کیلئے تمام تر توانائیاں صرف کر رہی ہے۔سماجی رابطے کی ویب سائٹ ٹوئٹر پر وزیراعلیٰ پنجاب کی معاون خصوصی ڈاکٹر فردوس عاشق اعوان نے کہا کہ پی ڈی ایم ٹولہ اپنے کرتوتوں سے وزیراعظم عمران خان کے ہر موقف کو درست ثابت کررہا ہے۔انہوں نے کہا کہ یوسف رضا گیلانی کے صاحبزادے علی حیدر گیلانی کی ویڈیو اس کی واضح مثال ہے۔فردوس عاشق اعوان نے کہا کہ انشااللہ آج تحریک انصاف کے ہاتھوں کرپشن کے بت گریں گے اور ایوان بالا میں عمران خان کا نظریہ کامیاب ہوگا۔انہوں نے مزید کہا کہ علی حیدر گیلانی کے اقرار جرم کے بعد کرپشن کے مال پر پلنے والے شہزادے کو مبارکباد کی بجائے قوم سے معافی مانگنی چاہیے تھی۔