ریاض(نیو زڈیسک) سعودی حکومت نے بیرون ملک مقیم اپنے شہریوں کے لیے پیدائش اور وفات کے قونصلیٹس یا سفارت خانوں میں اندراج کی سہولت کا اعلان کیا ہے۔غیرملکی خبررساں ادارے کی رپورٹ کے مطابق کسی بھی ملک میں مقیم سعودی شہری ملکی قونصلیٹس اور سفارت خانوں میں بچے کی پیدائش یا کسی کی وفات کا اندراج کرسکیں گے، یہ سہولت ممکنہ طور پر جلد فراہم کردی جائے گی۔سعودی قونصلیٹس اور سفارت خانہ مذکورہ امور کا اندراج کرے گا۔سعودی شہریوں اور وزارت داخلہ وخارجہ کے درمیان الیکٹرانک رابطے قائم کیے جائیں گے۔مذکورہ بالا سہولت کے علاوہ سعودی وزارت داخلہ نے ملک میں ’میدان‘ پلیٹ فارم کا دوسرا ایڈیشن بھی جاری کیا ہے، جس سے سیکیورٹی کے عمل میں آسانی پیدا ہوگی۔میدان کے دوسرے ایڈیشن میں مختلف ڈیجیٹل سہولتیں رکھی گئی ہیں۔ جن میں حج وعمرہ کے اجازت ناموں کا جائزہ اور ٹریفک حادثات کی رپورٹ پر غور سمیت دیگر امور شامل ہیں۔