بیجنگ (شِنہوا) چینی وزارت خارجہ کے ترجمان نے امریکی وزیرخارجہ اینتھونی بلنکن کے عالمی ادارہ صحت(ڈبلیو ایچ او) کی کوویڈ-19ماخذ کے حوالے سے رپورٹ سے متعلق الزامات مسترد کرتے ہوئے کہا ہے کہ ان کا ملک وبا سے متعلقہ معاملات پر بے بنیاد الزامات اور بلاوجہ کی طعنہ زنی کو کبھی بھی قبول نہیں کرے گا۔ترجمان ژاو لی جیان نے ان خیالات کا اظہار پیرکو پریس بریفنگ کے دوران بلنکن کے تازہ ترین انٹرویو سے متعلق پوچھے گئے ایک سوال کے جواب میں کیا،انٹرویو میں امریکی وزیرخارجہ نے کوویڈ-19 کے ماخذ کے حوالے سے عالمی ادارہ صحت کی آنے والی رپورٹ پر خدشات کااظہار کرتے ہوئے کہا تھا کہ چین اس رپورٹ کی تیاری میں مدد کررہا ہے۔ژاؤ نے کہا کہ عالمی ادارہ صحت اورچین کی مشترکہ ماہر ٹیم نے ووہان انسٹی ٹیوٹ آف وائرولوجی سمیت نو مقامات کا دورہ کیا اور طبی عملے ، سائنسی محققین ،صحت یاب ہونے والے مریضوں،طبی عملے کے افراد اور کوویڈ-19سے مرنے والے طبی عملے کے اہل خانہ اور عام لوگوں کے ساتھ تبادلہ خیال کیا اور تمام انتظامات ڈبلیو ایچ او کے ماہرین کی درخواست پر کئے گئے تھے۔ترجمان نے کہا کہ چین نے اصل اعداد و شمار بھی فراہم کیے جس کی ایک ایک چیز پرخصوصی توجہ دینے کی ضرورت ہے۔ ڈبلیو ایچ او کے ماہرین نے مشترکہ تحقیق پر مثبت خیالات کا اظہار کرتے ہوئے کہا کہ چین کا تعاون توقع سے بڑھ کر تھا۔ترجمان کا کہنا ہے کہ اس رپورٹ کا مسودہ دونوں اطراف کے ماہرین نے تیار کیا جس کو مسلسل سائنسی تحقیق کے ذریعے حتمی شکل دی جائے گی۔