اسلام آباد (نیشنل ٹائمز) وفاقی وزیر منصوبہ بندی اور چیئرمین نیشنل کمانڈ اینڈ آپریشن سینٹر اسد عمر نے کہا ہےکہ آئندہ3 روز میں تمام صوبوں میں ویکسینیشن کی بڑی مہم شروع کررہے ہیں، امیکرون وائرس جب پاکستان میں آجائےگا تو وقت نہیں ہوگا اس لیے آج ہی ویکسین لگوانے جائیں، ویکسینیشن سے ہی نئے ویرینٹ کے خطرے کو کم کیا جاسکتا ہے۔انہوں نے این سی اوسی اجلاس کے بعد مشیرصحت ڈاکٹر فیصل سلطان کے ہمراہ نیوز کانفرنس کرتے ہوئے کہا کہ جنوبی افریقہ میں کورونا کی نئی قسم امیکرون سامنے آئی ہے، کورونا کی یہ قسم انتہائی خطرناک ہے، وائرس دیگرممالک تک بھی پھیل گیا ہے۔ جب وائرس پاکستان میں آجائے گا تو ہمارے پاس زیادہ وقت نہیں ہوگا اس لیے کل کے بجائے آج ہی ویکسین لگوانے جائیں۔صوبوں کے ساتھ مشاورت جاری تھی آئندہ 2 سے 3 روز میں تمام صوبوں میں ویکسینیشن کی بڑی مہم شروع ہونے والی ہے۔ کورونا وائرس کا نیا ویرینٹ جیسے پوری دنیا میں پھیل رہا ہے یہ پاکستان میں بھی آئے گا، زیادہ سے زیادہ ویکسینیشن سے اس خطرے کو کم کیا جاسکتا ہے، آبادی کو وہ حصہ جنہیں کورونا سے زیادہ خطرہ ہے ان کیلئے ویکسین کے بوسٹر شاٹ کے منصوبے پر کام کیا جارہا ہے، پاکستان میں تقریباً 5 کروڑ افراد مکمل طور پر ویکسینیٹڈ ہیں جبکہ 3 کروڑ افراد کو ویکسین کی ایک خوراک لگ چکی ہے۔اسد عمر نے کہا کہ وائرس کے پھیلاؤ کی رفتار کا اندازہ اس سے لگائیں کہ 12 روز قبل جنوبی افریقہ میں کیسز مثبت آنے کی شرح 0.9 فیصد تھی اور اب وہ 9.77 فیصد ہوگئی ہے۔ انہوں نے کہا کہ متاثرہ ممالک سے مسافروں کی آمد پر پابندی لگا دی گئی اور مزید اقدامات کرنے جارہے ہیں تاکہ وائرس کی نئی قسم کو کنٹرول کیا جاسکے۔ ڈاکٹر فیصل سلطان نے کہا کہ گزشتہ چند روز سے مختلف ممالک سے وائرس کے دوبارہ پھیلاؤ کی اطلاعات موصول ہورہی ہیں اور وہاں میں اس سے مرنے والوں اور شدید متاثر ہو کر ہسپتال پہنچنے والوں کا تعلق ان افراد سے ہے جنہوں نے ابھی تک ویکسین نہیں لگوائی۔