اسلام آباد (نیشنل ٹائمز) نائب صدر ن لیگ مریم نواز کے شوہر کیپٹن ریٹائڑد محمد صفدر اعوان نے انکشاف کیا ہے کہ بڑے بڑے لوگوں کی فلمیں آنے والی ہیں۔اسلام آباد ہائیکورٹ میں پیشی کے موقع پر گفتگو کرتے ہوئے ان سے صحافی نے سوال کیا کہ نوازشریف کب وطن واپس آئیں گے کیا اگلے انتخابات سے قبل ان کی واپسی ہو گی؟ جس کے جواب میں کیپٹن ریٹائرڈ صفدر نے کہا کہ یہ تو فیملی سیکرٹ ہے کہ نوازشریف کب وطن واپس آئیں گے۔نوازشریف جب وطن واپس آئیں گے تو چار پانچ لاکھ لوگ لاہور ائیرپورٹ پر استقبال کریں گے۔صحافی نے سوال کیا کہ پچھلی مرتبہ شہباز شریف ائیر پورٹ نہیں پہنچ سکے تھے؟ جس پر انہوں نے کہا ٹینکوں توپوں کے سامنے کون رُک سکتا ہے،اب کی متربہ ایسا نہیں ہو گا۔ترکی کی تاریخ دہرائی جائے گی،ان کی خوش قسمتی ہے کہ میں پنڈی میں گرفتار ہوا۔انہوں نے آئندہ چند روز میں سابق چیف جسٹس ثاقب نثار کی سینما اسکوپ فلم کے آنے کی پیشگوئی کرتے ہوئے کہا کہ بڑے بڑے لوگوں کی فلمیں آئیں گی، کوئی سوئمنگ پول تو کوئی واش روم میں گھرا ہو اہے۔بہت جلد ایک سینما سکوپ فلم آنے والی ہے جو بڑی سکرین پر چلے گی، بڑا مزا آئے گا۔ صحافی نے سوال کیا کہ اس فلم کا ڈائریکٹر کون ہے؟ جس پر ان کا کہنا تھا کہ اس فلم کا ڈائریکٹر ایک عام پاکستانی ہے، وہ پاکستانی جو قائداعظم کو بتاتا ہے کہ پاکستان کمزور اور دو لخت ہو گیا۔دوسری جانب پاکستان مسلم لیگ ن کی رہنما مریم نواز نے سابق چیف جسٹس کی لیک آڈیو کو ثاقب نثار کے خلاف چارج شیٹ قرار دیا۔انہوں نے اسلام آباد میں پارٹی رہنماؤں کے ہمراہ پریس کانفرنس کرتے ہوئے کہا کہ پہلے ثاقب نثار نے کہا تھا کہ یہ آواز ان کی نہیں ہے۔ثاقب نثار کو آج تک نہیں تو کل سچ بتانا پڑے گا۔سابق چیف جسٹس نے انصاف کا قتل کیا،ان کی لیک آڈیو گناہوں کا اعتراف ہے۔ ان کی سازش کے خلاف قدرت کا نظام حرکت میں آ چکا ہے۔ مریم نواز کا کہنا تھا کہ ثاقب نثار بتائیں کس نے انہیں کہا کہ عمران خان کو لانا ہے۔بتائیں آپ کو کس نے مجبور کیا کہ نوازشریف اور مجھے سزا دیں۔ثاقب نثار بتائیں آپ غیر قانونی اقدامات کرنے پر کیوں مجبور ہوئے۔