اسلام آباد(نیشنل ٹائمز): ایک سینئر عہدیدار نے کہا ہے کہ اس وقت پاکستان کے امریکا کے ساتھ تعلقات نچلی ترین سطح پر ہیں۔حال ہی میں ہونے والے پارلیمنٹ کی قومی سلامتی کمیٹی کے اجلاس میں ارکان پارلیمنٹ کوبریفنگ کے دوران بتایا کہ اگر پاکستان مکمل طور پر چین کے کیمپ میں شامل ہوتا ہے تو اسے امریکا اور اس کے اتحادیوں کے غصے کا سامنا کرنا پڑ سکتا ہے، اس لیے پاکستان کو امریکا اور چین سے تعلقات میں توازن برقرار رکھنا پڑے گا۔ایک رکن پارلیمنٹ نے اپنا نام ظاہر نہ کرنے کی شرط پر بتایا کہ کمیٹی کو ایک سینئر عہدیدار نے بتایا کہ اس وقت امریکا کے ساتھ تعلقات نچلی ترین سطح پر ہیں اور امریکا اور چین کے ساتھ تعلقات میں توازن قائم کرنیکی کوششیں کامیاب ہوتی دکھائی نہیں دے رہیں، افغانستان سے انخلاء کے بعد امریکہ کے ساتھ تعلقات مزید خراب ہونے کا خدشہ ہے۔