اسلام آباد (مانیٹرنگ ڈیسک )وزارت پٹرولیم اور سوئی ناردرن گیس کمپنی کی جانب سے سردیوں کیلئے بنایا گیا گیس فراہمی کا شیڈول سامنے آگیا ہے جس کے تحت صوبہ پنجاب اور خیبر پختونخواہ کے صارفین کو بس چند ہی گھنٹے کیلئے گیس دی جائے گی ۔نجی ٹی وی کے مطابق سوئی ناردرن نے گھریلو صارفین کے لیے صبح، دوپہر اور شام کو گیس دینے کا شیڈول تیار کر لیا ہے ،ذرائع کا کہنا ہے کہ پنجاب اور خیبر پختون خوا کے گھریلو صارفین کو صبح ساڑھے 5 بجے سے ساڑھے 8 بجے تک گیس ملے گی، پھر دن ساڑھے 11 بجے سے 2 بجے تک اور پھر شام 4 بجے سے رات 10 بجے تک گیس ملے گی۔سوئی ناردرن کمپنی کے ذرائع نے بتایا ہے کہ گیس کی فراہمی کے اس شیڈول کا نفاذ دسمبر سے ہو گا اور اس پر فروری تک عمل ہو گا۔