پشاور(نیشنل ٹائمز) پاکستان پیپلزپارٹی کے مرکزی سیکریٹری اطلاعات فیصل کریم کنڈی نے کہا ہے کہ خیبرپختونخواہ حکومت پشاور میں یوم تاسیس کے جلسے کی اجازت دے یا نہ دے پاکستان پیپلزپارٹی ہر صورت میں 30نومبر کو پشاور میں جلسہ کرے گی۔ انہوں نے کہا کہ حکومت کی جانب سے پشاور میں یوم تاسیس کے موقع پر پیپلزپارٹی کو جلسہ کرنے کی اجازت نہ دے کر پی ٹی آئی نے ثابت کر دیا ہے کہ عمران خان بلاول بھٹو زرداری سے ڈر گئے ہیں۔ اس لئے پیپلزپارٹی کے کے پی میں بڑھتے ہوئے قدموں کو روکنے کی کی کوشش کر رہی ہے۔ فیصل کریم کنڈی نے کہا کہ عمران خان کہتے تھے کہ اپوزیشن احتجاج کرے وہ کنٹینر دیں گے مگر ہمارے جلسوں کو روکا جا رہا ہے۔ انہوں نے کہا کہ ملک بھر سے عوام کے قافلے پابندی اور رکاوٹوں کے باوجود پشاور آئیں گے اور عوامی سیلاب کو عمران خان روک نہیں سکتے۔ بلاول بھٹو زرداری کو جلسہ کرنے کی اجازت نہ دینے سے بلاول بھٹو زرداری کی بڑھتی ہوئی مقبولیت کا سلسلہ رک نہیں سکتا۔