اسلام آباد(نیشنل ٹائمز)پاکستان پیپلز پارٹی کے رہنما اور رکن قومی اسمبلی قادر پٹیل نے مراد سعید کے بیان پر ردعمل کا اظہار کرتے ہوئے کہا ہے کہ چیئرمین بلاول بھٹو زرداری پر مراد سعید کی تنقید چاند پر تھوکنے کے مترادف ہے۔ مراد سعید کی زبان، بیان اور لہجہ ان کی ماضی کی صحبتوں کی گواہی دے رہا ہے۔ قادر پٹیل نے کہا کہ پاکستان پیپلزپارٹی نے ڈو مور کے مطالبے پر کبھی سر نہیں جھکایا بلکہ سلالہ سانحے پر امریکہ سے معافی منگوائی تھی۔ مراد سعید کو پتہ ہی نہیں کہ ڈو مور پر ڈھیر ہونے والے ڈکٹیٹرجن کا ریفرنڈم میں عمران خان چیف پولنگ ایجنٹ تھا وہ ڈکٹیٹر ان دنوں ملک سے بھاگا ہوا ہے۔ قادر پٹیل نے کہا کہ مراد سعید کی سیاست میں کوئی محنت نہیں اس لئے وہ دوسروں پر تنقید کرکے نمایاں نظر آنے کی ناکام کوشش کرتے ہیں۔ قادر پٹیل نے کہا کہ مراد سعید جب بھی منہ کھولتے ہیں عوام کی ان کے 200 ارب ڈالروں کی یاد میں ہنسی چھوٹ جاتی ہے۔ پاکستان کی سیاست کا المیہ یہ ہے کہ مراد سعید بھی سیاستدان کی تختی سینے پر لگائے ایوان میں گھوم رہے ہیں۔