تحریر : تمحید صادق

انگلینڈ اور بھارت کے درمیان پانچواں اور آخری کرکٹ ٹیسٹ جو کہ جمعہ 10ستمبر سے اولڈ ٹریوفورڈ مانچسٹر میں کھیلا جانا تھا بظاہر انڈین کھلاڑیوں کے کورونا بڑھنے کے خوف کی وجہ سے کینسل کر دیا گیا کیونکہ اگر کوئی کھلاڑی کورونا کے مرض میں مبتلا ہو جاتا ہے تو وہ کھلاڑی آئی پی ایل جو کہ 19ستمبر سے دبئی میں شروع ہونے جارہی ہے وہ چودہ دن کے قرنطینہ کے باعث لیگ کے ابتدائی رائونڈ نہیں کھیل پاتا۔ لہٰذا اس خدشے کے مد ِ نظر کھلاڑیوں نے مناسب سمجھا کہ ٹیسٹ میچ ہی منسوخ کروا دیا ۔حیرانگی کی بات یہ ہے کہ آئی سی سی اور ای سی بی نے میچ انگلینڈ کے حق میں فورفیٹ کرنے کی بجائے منسوخ کر دیا اور اس کا کوئی نوٹس نہیں لیا تاکہ بھارتی ٹیم کی رینکنگ متاثر نہ ہوپائے ۔انڈین کرکٹ بورڈ کااثر رسوخ اور جادو آئی سی سی اور بیشتر کرکٹ بورڈ پر اتنا سر چڑھ کر بولتا ہے کہ وہ ان کے ہر فیصلے کے آگے سر خم تسلیم ہوتے ہیں۔میچ کی اس بے وجہ کی منسوخی کی وجہ سے ایک طرف شائقین کرکٹ کو بہت مایوسی ہوئی تو دوسری طرف براڈ کاسٹنگ کمپنی ، سپانسرز اور دیگر کاروبار جو اس ٹیسٹ سے منسلک تھے انہیں ناقابل تلافی مالی نقصان کا سامنا کرنا پڑا۔