اسلام آباد(نیشنل ٹائمز) پاکستان پیپلزپارٹی کے سیکرٹری جنرل سید نیر حسین بخاری نے مجوزہ میڈیا ڈویلپمنٹ اتھارٹی کے قیام پر ردعمل میں کہا ہے کہ مجوزہ ظالمانہ سنسر شپ آمرانہ ذہنیت اقدام ہے ۔پیپلز پارٹی جمہوری حق کی خاطر جدوجہد میں جرات مند صحافیوں کے شانہ بشانہ ہے۔ انہوں نے کہا کہ صاف نظر آ رہا کہ میڈیا پر کنٹرول کا مقصد حکمران خاندان اور پی ٹی آئی مالی معاونین کی بدعنوانیوں کو چھپانا ہے۔نیر بخاری نے کہا کہ سنجیدہ حلقوں کا استدلال درست ہے کہ اگر حکمرانوں کا دامن صاف ہے تو تنقید سے خوف کیسا اور کیوں ہے۔ حکمرانوں میں حق اور سچ سننے کی ہمت ہی نہیں ہے ۔انہوں نے کہا کہ حکمرانوں کے آقا بھی سچ کی آوازوں کو کالے قوانین کے زریعے روکنے میں ناکام رہے ہیں ۔یہ بھی دباؤ کے حربوں اور ہتھکنڈوں میں کامیاب نہیں ہو سکیں گے ۔نیر بخاری نے مزید کہا کہ حکمراں پی ایم ڈی اے کے نام پر فسطائی ہتھکنڈوں میں کامیاب نہیں ہونگے اور گڈ گورننس کے دعویداران کے ماتھے پر بدعنوانی نااہلیت اور نالائقی کے سجے داغ پابندیوں سے دھل نہیں سکتے ۔نیر بخاری نے کہا ہے کہ پیپلز پارٹی آزادی اظہار پر کسی بھی قدغن کو کامیاب نہیں ہونے دے گی ۔بنیادی آئینی حقوق پر پابندیاں جمہوری پاکستان کی نفی کے مترادف ہے۔نیر بخاری نے مزید کہاکہ ایک کروڑ نوکریوں پچاس لاکھ گھروں کے جھوٹے وعدے کرنے والوں کو چھت رہائش اور روزگار چھیننے کی یاد دہانی کراتے رہیںگے۔