کراچی(نیشنل ٹائمز)کراچی میں نادرا کا سافٹ ویئر محکمہ صحت کے عملے کے ہاتھوں کمائی کا ذریعہ بن گیا، اطہر کی 2 ہزار روپے میں ویکسین کارڈ جاری کرنے کی ویڈیو جیو نیوز کو موصول ہوگئی۔نادرا ریکارڈ میں مردہ شخص کو ویکسین لگانے کا اندراج اربن ہیلتھ سینٹر میں کیا گیا، نارتھ کراچی کے اربن ہیلتھ سینٹر کے ویکسی نیٹر اطہر عالم نے نادرا ریکارڈ میں انٹری کی۔اطہر عالم ویڈیو میں شہریوں سے بغیر ویکسین لگائے کارڈ جاری کرنے کی ڈیل کررہا ہے۔پہلے نادرا ریکارڈ میں چیک کرلیں پھر پیسے دیں، اطہر عالم کی ویڈیو میں بات چیت ہوئی، شہری نے ڈھائی سال پہلے انتقال کرجانے والے شخص کا شناختی کارڈ نمبر دے دیا۔نادرا ریکارڈ کے مطابق عبدالندیم کو 16 اگست 2021 کو سائنو فارم کی ایک ڈوز لگائی گئی۔1166 پر مردہ شخص کو کوڈ بھی جاری ہوا اور پھر ویکسین بھی لگا دی گئی، محکمہ صحت کے عملے کے ہاتھوں نادرا سافٹ ویئر کے غلط استعمال نے ڈیٹا پر سوالات اٹھا دیئے۔