اسلام آباد(نیشنل ٹائمز)امریکی صدر جو بائیڈن نے کہا ہے کہ انہوں نے اشرف غنی کو مشورہ دیا تھا کہ وہ طالبان سے مذاکرات کریں مگر انہوں نے اس سے صاف انکار کر دیا اور کہا کہ افغان فوج طالبان سے لڑے گی۔افغانستان کی صورت حال سے متعلق اہم ترین بریفنگ میں امریکی صدر جو بائیڈن کا کہنا تھا کہ ظاہر ہے اشرف غنی غلط نکلے، افغان رہ نما حوصلے چھوڑ گئے اور ملک سے بھاگ نکلے۔ان کا کہنا ہے کہ ہم نے افغان فوج کو سب کچھ دیا مگر انہیں لڑنے کا عزم اور حوصلہ نہ دے سکے۔امریکی صدر نے ایک بار پھر طالبان کو تنبیہ کی کہ اگر انہوں نے امریکا کے انخلاء کے منصوبے میں رکاوٹ ڈالی تو امریکا کا ردِعمل فوری ہو گا اور ہم اپنے لوگوں کا دفاع تباہ کن قوت سے کریں گے۔انہوں نے سابق افغان حکومت کی ناکامی کی وجوہات کھل کر بیان کر دیں کہ افغان قیادت اپنے ملک کی خاطر بات چیت میں ناکام رہی۔امریکی صدر جو بائیڈن نے سابق افغان حکومت کی فوجی شکست پر بھی کھل کر بات کی اور کہا کہ ہم نے افغان فوج کو تنخواہیں تک دیں، فضائی قوت سے لیس کیا، مگر انہیں لڑنے کا عزم اور جرأت نہ دے سکے۔انہوں نے ایک بار پھر یہ بات دہرائی کہ امریکی فوج کی واپسی کے فیصلے پر شرمندگی نہیں۔امریکی صدر نے یہ بھی کہا کہ امریکا کے لیے دہشت گردی کے خطرے کو کم کرنا امریکا کا مشن تھا، افغانستان کی صدیوں کی تاریخ بدلنا ہمارا مشن نہیں تھا۔