کابل(شِنہوا)افغانستان کے قائم مقام وزیر برائے صحت واحدمجروح نے نوول کروناوائرس کیخلاف ملکی جنگ میں چین کو بڑا شراکت دار قرار دیا ہے اور متعدد بار امداد پر بیجنگ کا شکریہ ادا کیا۔مجروح نے شِنہوا کو ایک انٹرویو میں بتایا کہ خاص طور پرجب صحت کی خدمات کی فراہمی کی بات ہوتی ہے توچین ہمارے سب سے موثر شراکت داروں میں سے ایک ہے،تعاون نوول کروناوائرس سے بڑ ھ کر ہے، وبائی امراض کے دوران چین نے مختلف مواقع پر ہماری مدد کی۔مجروح نے کہاکہ نوول کروناوائرس کیخلاف جنگ کے ابتدائی ایام میں، جب کہ چین کو خود ان چیزوں کی ضرورت تھی تب اس نے ہمیں وینٹی لیٹرز، چہرے کے ماسک اور جراثیم کش مواد فراہم کیا۔وزیر نے کہاکہ ہم مدد کرنے پر چین کا شکریہ ادا کرتے ہیں جو ویکسینز کا عطیہ جاری رکھے ہوئے ہے،یہ افغانستان کی ویکسی نیشن مہم کیلئے بہت مددگار ہے اور یہ دونوں ممالک کے مابین دوستی کی علامت بھی ہے۔نوول کروناوائرس کے ماخذ کا پتہ لگانے بارے بات کرتے ہوئے وزیر نے کہاکہ چین نے جس کھلے پن اور شفافیت کا مظاہرہ کیاہے ہم اس کی واقعی تعریف کرتے ہیں۔انہوں نے کہاکہ عالمی وبا کے ماخذ بارے فیصلہ کرنا بہت مشکل ہے اورمختلف جغرافیہ اور مختلف اداروں میں ماخذ بارے ٹھوس شواہد اکٹھے کرنے چاہئیں۔