اسلام آباد(نیشنل ٹائمز)پاکستان مسلم لیگ ضیا کے سربراہ اعجازالحق نے کہاہے کہ شاہ محمود قریشی اور عمران خان کے علاوہ جیل سے باہر موجود پی ٹی آئی کے ہر رہنما کا اس وقت اسٹیبلشمنٹ سے رابطہ ہے۔ ایک انٹرویو میں اعجازالحق نے کہا کہ یہ ہو نہیں سکتا کہ وزیراعلی خیبرپختونخوا کا (اسٹیبلشمنٹ )سے رابطہ نہ ہو، یا ان کی جو اہم شخصیات ہیں ان کا رابطہ نہ ہو، بالواسطہ یا بلاواسطہ سب کا رابطہ ہے اور بہت سے تو ایسے ہیں جن کے بہت زیادہ روابط ہیں اسٹبلشمنٹ کے ساتھ بھی اور حکومت کے ساتھ بھی۔ اعجازالحق نے کہا کہ یہ جو گفتگو ہو رہی ہے کہ ہم اسٹیبلشمنٹ کے ساتھ ڈائریکٹ مذاکرات چاہتے ہیں تو ڈائریکٹ مذاکرات تب ہی ہو سکتے ہیں جب ان ڈائریکٹلی حکومت اسٹیبلشمنٹ سے درخواست کرے کہ اب ہم چاہتے ہیں راستہ ہموار ہو تو آپ ایک نیوٹرل ادارے کی حیثیت سے اس میں اپنا کردار ادا کریں۔ انہوں نے کہا کہ جب عمران خان اپنی ذہن سازی کرلیں گے کہ اب مجھے آگے چلنا ہے مذاکرات کرنے ہیں تو راستے اپنے آپ کھل جائیں گے۔کیا عمران خان ملک سے باہر جانے کی خواہش کا اظہار کرسکتے ہیں؟ اس سوال کے جواب میں اعجازالحق نے کہا کہ اس سوال کا جواب تو شاید ان کی بیگم بھی نہ دے سکیں۔