اسلام آباد (نیشنل ٹائمز)جمعیت علمائے اسلام(ف) کے ترجمان اسلم غوری نے کہا ہے کہ پی ٹی آئی قیادت اپنے اندرونی معاملات میں ہمیں نہ گھسیٹے، ہم اپنی تحریک شروع کر چکے ہیں، انتظار کرنے کے عادی نہیں۔علی امین گنڈا پور اور دیگر پی ٹی آئی رہنمائوں کے بیانات پر ترجمان جے یو آئی نے ردعمل دیتے ہوئے کہا کہ اسمبلی فلور پر جے یو آئی کے اصولی اور جمہوری موقف سے پی ٹی آئی کے دوسرے درجے کے رہنما غلط فہمی کا شکار ہو گئے ہیں ، جے یو آئی نے سیاست میں ہمیشہ جمہوری اور اصولی موقف اپنایا ہے، پی ٹی آئی قیادت اپنے اندرونی معاملات میں ہمیں نہ گھسیٹے۔انہوں نے کہا کہ پی ٹی آئی کے ساتھ چلنے سے قبل ہمارے تحفظات کو دور کرنا ضروری ہوگا، ہم اپنی تحریک شروع کر چکے ہیں، انتظار کرنے کے عادی نہیں ہیں۔ترجمان جے یوآئی نے کہا کہ کل سندھ کے عوام عوامی اسمبلی کراچی میں فروری کے انتخابات کو بھاری اکثریت سے مسترد کریں گے۔