اسلام آباد(نیشنل ٹائمز)جمعیت علمائے اسلام ف کے سربراہ مولانا فضل الرحمن نے کہاہے کہ مذہبی جماعتوں کو سائیڈ لائن کیا جاتا ہے،ملک میں جمہوریت نہیں ہے ،زیادہ وقت مارشل لاء رہا ہے،نواز شریف کو کہتا ہوں کہ اگر پی ٹی آئی اکثریت میں ہے تو اسکو اقتدار دے دیں۔پیر کے روز قومی اسمبلی کے اجلاس میں نکتہ اعتراض پر اظہار خیال کرتے ہوئے مولانا فضل الرحمن نے کہا کہ اس پارلیمان میں قرآن و سنت سے متصادم قانون سازی کی گئی۔حالیہ عام انتخابات ڈھونگ تھے،پارلیمنٹ میں حقیقی نمائندے نہیں بیٹھے ہوئے ہیں، امن وامان کی صورتحال مخدوش ہے،عوام مہنگائی کی چکی میں پس رہے ہیں ہمیں الیکشن مہم بھی نہیں چلانے دی گئی ، دیوار سے لگا دیا گیا،بلوچستان میں ریاست کا کنٹرول نہیں ہے ،پاکستان غیر محفوظ ریاست بن چکا ہے،مشرف کی پالیسیوں نے ملک تباہ کر دیا،ملک غلط ڈگر پر چل رہا ہے۔ انہوں نے کہا کہ امریکہ نام نہاد انسانی حقوق کا علمبردار بنا ہوا ہے۔ہم کس کے ہاتھ پہ اپنا لہو تلاش کریں۔دنیا میں ظلم برپاہے۔نواز شریف کو کہتا ہوں کہ اگر پی ٹی آئی اکثریت میں ہے تو اسکو اقتدار دے دیں۔بلاول بھی اپنی ذمہ داری ادا کریں۔انہوں نے کہا ہم ہر شہر میں ملین مارچ کریں گے ہمارا راستہ نہ روکا جائے۔