اسلام آباد (نیشنل ٹائمز) پاکستان تحریک انصاف کی رہنما زرتاج گل نے کہا ہے کہ جس سے بھی بات چیت ہوگی وہ صرف بانی پی ٹی آئی ہی کریں گے، بات چیت کا اختیار صرف بانی پی ٹی آئی کے پاس ہے ،عو ام کیلئے لاٹھی گولی کی سرکار ہے، اپنے خاندان کیلئے ڈپٹی پرائم منسٹر کا عہدہ بھی نکل آتا ہے۔ نجی ٹی وی سے گفتگو کرتے ہوئے زرتاج گل نے کہا کہ بانی پی ٹی آئی کو کوئی بائی پاس نہیں کرسکتا، شہریار خان آفریدی نے سختی میں طنزیہ یہ بات کہہ دی کہ فوج کی قیادت سے جلد مذاکرات ہوں گے۔ جہاں تک سیاسی جماعتوں سے بات چیت کا تعلق ہے تو جس وزیراعظم کی گھڑی میں 26 گھنٹے بجتے ہوں، تو ان سے کس گھنٹے میں بات کریں۔ زرتاج گل نے بھی طنزیہ بات کرتے ہوئے کہا کہ وزیرداخلہ نے اپنے لئے وزیراعظم رکھا، شہباز شریف کو پتہ ہے کہ میری کوئی خاص حیثیت نہیں ، انہوں نے اپنے لئے ایک ڈپٹی پرائم منسٹر رکھ دیا، اب ڈپٹی پرائم منسٹر اپنے لیے ایک اسسٹنٹ پرائم منسٹر رکھ دیں گے۔انہوں نے کہا کہ اب یہ بتائیں کہ اس میں کس چین سے پاکستان تحریک انصاف نے بات کرنی ہے۔ اگر آپ نے بات چیت کرنی ہے تو پہلے ظلم کے دروازے بند کریں۔زرتاج گل نے سوال اٹھایا کہ آئین میں ڈپٹی پرائم منسٹر کا عہدہ کونسا ہے؟ آپ نے عہدوں کی بندر بانٹ اپنے ہی خاندان میں کرنی ہے، بیٹی کو دینے ہیں سمدھی کو دینے ہیں تو پاکستان کے 25 کروڑ عوام کا کیا قصور ہے؟ عوام کیلئے آپ کی لاٹھی گولی کی سرکار ہے، اپنے خاندان کیلئے ڈپٹی پرائم منسٹر کا عہدہ بھی نکل آتا ہے۔