اسلام آباد(نیشنل ٹائمز)اسلام آباد کی ڈسٹرکٹ اینڈ سیشن عدالت نے پاکستان تحریک انصاف کے28 ویں یوم تاسیس اور گرفتار راہنماؤں و کارکنان کی رہائی کے لیے ریلی نکالنے کے مقدمے میں چیئرمین تحریک انصاف گوہر خان، قومی اسمبلی میں قائدحزب اختلاف عمر ایوب خان، عامر ڈوگر و دیگر کی عبوری ضمانتیں منظور کرلی ہیں.
نجی ٹی وی کے مطابق ایڈیشنل ڈسٹرکٹ اینڈ سیشن جج اویس محمد خان نے ملزمان کی درخواست ضمانت پر سماعت کی، ملزمان کی جانب سے علی بخاری ایڈووکیٹ، انصر کیانی، مرتضی طوری ایڈووکیٹ و دیگر عدالت میں پیش ہوئے. سماعت کے دوران دلائل دیتے ہوئے وکیل نے بتایا کہ انتظامیہ نے جھوٹا اور بے بنیاد مقدمہ درج کیا ہے، سیاسی بنیاد پر یہ مقدمہ درج کیا گیا ہے، جب بھی پرامن احتجاج کرتے ہیں نیا مقدمہ درج ہوتا ہے.
وکلا نے استدعا کی کہ راہنماؤں کی ضمانت منظور کی جائے اور پولیس کو گرفتاری سے روکا جائے بعد ازاں عدالت نے 5،5 ہزار روپے کے مالیتی مچلکوں کے عوض تحریک انصاف کے راہنماؤں کی عبوری ضمانت منظور کرلی عدالت نے فریقین کو جواب جمع کروانے کے لیے نوٹس جاری کرتے ہوئے سماعت7 مئی تک ملتوی کردی .